Lalaki Raheut Haténa
Peuting nu jempling
Kuring ngajentul disaksian
ku bentang nu baranang
Bulan nu sapasi jadi saksi
tunggarana hate
‘Neng hapunten tina sadaya
kalepatan akang
Rumaos akang tambelar ka ‘Neng
tapi tong dihartoskeun Akang teu cinta
Mun seug eusi hate bisa dibedah
tur dibolekerkeun
ngan ukur ngaran ‘Neng nu nyangkaruk na ati
Kiwari kuring ngarahuh
waktu nu geus liwat
geus moal bisa dibalikan deui
mun seug teu era ku diri
kuring hayang miang,
miang nu sajauh-jauhna
Panyangka kuring mah
anjeun teh rek satia
tapi sihoreng geuning belang bayah
Jalir tina jangji, teu kuat ku gogoda
Sakuat tanaga kuring ngajaga
ieu rasa kacinta jeung kanyaah
Dipiara, dihade-hade jeung didama-dama
tapi sihoreng mung
kakuciwaan nu kasorang
Paingan atuh hate teh
sok marojengjat wae
da geuning nu asih dipulang sengit
Kunaon anjeun tega mutuskeun
tali kacinta jeung kanyaah..!
mun seug rek kieu jadina
kunaon teu ti baheula
Kapan baheula mah anjeun teh
sakidu deudehna..!!
Memang manusa mah sok keuna ku owah gingsir
tapi kunaon bet tumiba ka anjeun
wanoja nu kacida dipikanyaah
jeung dipikadeudeuh ku kuring
Najan ayeuna urang geus
teu aya pasini jangji deui
hate kuring hamo moal bisa
mopohokeun anjeun
Kanyeri jeung kapeurih hate
ngagurat lir prasasti
Raheut nu aya dina hate
asa hese ngubaranana
Leuwih peurih tibatan digerihan ku hinis
Leuwih nyeri tibatan kasabet seukeutna pedang
Satekah polah kuring meper ieu amarah
Kuring embung mun disebut jalma nu lemah
Embung mun disebut lalaki lemah iman
tapi kuring ge manusa biasa
Kasabaran mah aya watesna
Tapi kapan kangaranan Pangeran mah
Maha Adil
Melak hade bakal hade nu diala
Melak goreng nya wayahna balai nu tumiba
Mung ka Gusti kuring jumerit
nuhunkeu pitulung Mantenna
Mugi sing dipasihan kasabaran
jeung kakiatan
Mugi sing dipasihan Wanoja
nu leres-leres micinta tur satia
Karawang, 15 januari 2004
Amat Hanafi
Nu keur tunggara
(Lalaki Raheut Hateuna)