Méga bodas tungtung gunung
(susukan Cisadane, 22 Jan 2004)
Sok waas mangsa jaman keur budak…
Basa remen nyawang ti kaangangan
Nyawang mega bodas
tingrunggunuk tungtung gunung
Bodas nyacas jiga kapas
Dina langit kulaas ngaharu-biru
Basa angin halodo ngahiliwir…
Nyambuangkeun bau taneuh garapan
Nu mawa ka tentrem hate
Disaeur ku nyambuangna seungit pare
Mangsa keur panen
Suka bungah…
Gogonjakan
Basa keur manteng langlayangan di tengah sawah
Ber…hiber jauh ka jomantara…
Ber hiber…ngapak mega ngawang-ngawang
Jeung angin halodo anu mimiti mesat jiga panah
Bawa ieu hate kuring dina raga anjeun..
Panteng…manteng langlayangan…
Jung sing..jadi jawara..
Hontal mega bodas kayungyung di tungtung gunung
Ngahontal sagala harepan…
Bejakeun anjeun mawa bodas hate kuring
Ngahirupkeun harepan anu geus lawas
Mawa warna hirup kumbuhna manusa
Mawa endah dina alam
Basa harepan mupuhna pinuh na hate,
Budal dina sarewu kaendahan..
Kanggo harepan anu masih ngancik
Mangsa ayeuna, waktos abdi nolih deui mega bodas ngalanglangan
Geuning teu endah jiga syak wasangka
Hideung kahirupan geus maseuhan
Eleh kahirupan geus teu nampeuhan
Najan anjeun mega bodas, masih keneh nyacas jiga kapas
Keun, da na hate kuring masih ngancik panutan
Jeung…
Ka Gusti Nu Maha Suci
||Jalak Harupat
||Sumedang Tandang Nyandang Kahayang
