Kuntul bodas
Ngolenyay bodas
Ngiciskeun jangjangna
Ngalayang dina sela-sela hejona pare
Ti hiji galengan ka nu galengan nu lain
Neangan beunteur jeung burayut
berenyit jeung julung-julung
ngabrul dua..tilu, teu hiji wae
diserangkeun ti kajauhan
Di Serang…
Sore ieu..pas jam 3 pasosonten
bodasna matak waas matak was-was
ngalayangna matak kelar kana hate
ngalayangkeun deui ka bumi Priangan
teup..eunteup
tong eunteup…heug hiber sing lila
meh kuring teleb dina endahna anjeun
meh kuring kasurupan deui alam katukang
Basa sawah masih keneh di wuluku
Jeung kuntul bodas ngalayang di luhureun sawah urang
Basa ebreh anjeun jiga lukisan Monalisa
Ditukangna gambar Gunung Ciremai jeung Cakrabuana
teup…eunteup dina galengan
Ah…teu karasa lengkah kuring nepi ka dieu
Ngaliwatan bates waktu
Jeung bates kakawasaan
Anu pegat taun kamari
Jejer lampah asa kabeulah
Aya lalangse meulah ti laut Jawa nepi ka Laut Kidul
Gunung Karang satukangeung
Jiga ngaheroan keur ngojay kana sagara ingetan
Asa inget jeung apal ka guratna
Moal weleh poho, moal weleh bisa dipapalerkeun
Cisadane, Gunung Karang, sisi basisir Carita
Moal bisa ngaganti Cimanuk jeung Tampomas
ngan lukisan Monalisa geus luntur kahujanan
||Jalak Harupat
||Sumedang Tandang Nyandang Kahayang