Keur sumedang
“Keur Sumedang, urang tandang…”
kadenge deui, kareungeu deui
unggal isuk, unggal ngarenghap
unggal mukaan album
ayeuna anggang, jauh tina panenjo
lalaunan sok kagambar mun keur ngalangeu
Tampomas nu mawa kelar
ngagupayan ngajak balik
balik pikeun ngabaladah pihumaeun
moponteng cikahuripan
Cicaneang teuing lampar
maseuhan Sumedang Larang
Ki Sumedang beuki hariwang
kasimbeuhan dayeuh Bandung
Jatinangor beuki bangor
Cikeruh tos lami kiruh
Cibeusi beuki dakian
atuh Tangjung Sari mimiti leungit asrina
Ti kaler mah lain deui
jati, senggon, beak dengkak
geus puguh johar jeung jengkol
dirajang dijual atah
jadi suluh jalma jelug
ngahaneutan hawu vila
Kumaha ari ti wetan kidul
boa-boa Sabeulit ge geus bulistir
leuweung Sanca boa geus beak
kamana nya pilumpateun
pikeun nyiruruk anak incu
boa Sumedang bener, keur ngarangrangan
Tungtung Seoul, April 19, 2004.
(Kang Yaya – asli pituin Sumedang)